Ова е единствениот остров во Источна Македонија и се наоѓа во атарот на селото Дулица, на само четири километри од Македонска Каменица
Островот е локалитет на утврден рударски град, познат како Град на калајот (оттаму и името ‘Калата’)
Островот е со површина од 1,5 хектар, долг е 300, а широк 70 метри
Во Калата се топело калај и злато со загревање карпи со златоносни жици, кои со помош на длета биле вадени и претопувани.
Одбран бил за таа намена затоашто градот бил природно заштитен од реките Брегалница и нејзината притока Каменичка Река, а дел бил заштитен со дебели одбранбени ѕидови изѕдидани со малтер и вар.
Покрај јавните порти, постоеле и тајни тунели за излегување и за влегување во градот, за негово тајно снабдување во кризни и воени времиња.
Во Градот на калајот млеко пристигнувало преку млековод долг десетина километри и направен од керамички ќунци. Квалитетното млеко што доаѓало од повисоките планински села на Осогово во Калата се преработувало во сирење, урда, кашкавал, кои потоа успешно се продавале на многу пазари.
